23.3.2017 Бомба за крајот на репрезентативната кариера на Подолски
Германскиот фудбалер Лукаш Подолски на совршен начин ја заврши репрезентативната кариера – со еврогол во неговиот последен натпревар.
Германците во пријателската средба ја совладаа Англија со минимален резултат (1-0), а стрелец на единствениот погодок беше Подолски во 69-тата минута.
Тој го прифати повратното додавање од Ширле и од повеќе од 20 метри ја испрати топката во горниот десен агол на голот којшто го бранеше Џо Харт.
Тоа беше 49-ти погодок на напаѓачот за националниот тим на 130 натпревари, со што е заокружена фантастичната кариера на Подолски – со „панцирите“ ја освои светската титула во 2014 година, беше вицешампион на Европското првенство во 2008 година, а со Баерн во 2007/08 дојде до двојната круна.
„Елфот“ по 13-ти пат триумфираше против Англија, а единствено во тоа повеќе пати успеваа Шкотите и Велшаните.
Во останатите пријателски натпревари синоќа, Кипар го победи Казахстан со 3-1, Шкотска и Канада ремизираа 1-1, додека Чешка беше убедлива против Литванија (3-0).
Голот на Подолски кој ја победи Англија