18.4.2017 „Лисиците“ го живеат европскиот сон
Атлетико од Мадрид отпатува во Лестер на мегдан со актуелниот шампион на Премиер лигата. Мадриѓаните во првиот дуел славеа со 1-0, по контроверзниот пенал кој го погоди Антоан Гриезман.
Лестер добро се бранеше во првиот дуел и да немаше грешки од страна на судиите, веројатно дома ќе се вратеше без примен гол.
Крег Шекспир веројатно нема да менува многу тактики, ќе се обидува од контранапад со брзоногиот Варди и Оказаки да дојде до гол, а текот на натпреварот ќе одлучи како ќе се развива играта.
Лестер бара ново изненадување во Лигата на шампионите за да ги помести границите на историјата на клубот, но и нов пресврт против Шпанците, бидејќи во претходната рунда ја елиминира Севилја токму по поразот во гости.
Иако Атлетико, пред сè поради искуството во Лигата на шампионите, однапред е прогласен за фаворит, тренерот Диего Симеоне изјави дека шансите се 50:50.
„Целиот влог го дадоа на реваншот, ќе биде вистинска битка. Имаме добар резултат од Мадрид, но сите знаеме каква атмосфера прават англиските навивачи. Шансите се подеднакви“, изјави Симеоне.