Сити убедлив против Вест Бромич, се збогува Забалета

Фудбалерите на Манчестер сити се приближија до Лигата на шампионите следната година со победата над Вест Бромич албион од 3-1, а Пабло Забалета го одигра последниот натпревар.

Тој во Манчестер сити дојде пред девет години и на крајот на оваа сезона ќе си замине од клубот. Во Англија има понуда од Вест хем, но неизвесно е дали ќе ја прифати.
Арсенал во вториот натпревар го победи отпишаниот Сандерленд со 2-0 и се приближи до Ливерпул со заостанување од само еден бод.
„Граѓаните“ целиот натпревар против вест Бромич албион го одиграа мотивирано и убедливо. Концентрацијата попушти само на крајот, кога Робсон-Кану им даде гол во 87-мата минута. Со победата моментно го презедоа третото место од Ливерпул и сега имаат 75 бодови на табелата на Премиер лигата.
Арсенал се намачи во првиот дел од играта против Сандерленд. И покрај нападите и добрите шанси на Жиру и Белерин не дојдоа до предност. Шанси имаше и Сандерленд со обидите на Дидие Н’Донг и Џеремјн Дефо.
„Топчиите“ се во променлива форма во текот на целата сезона. Се наоѓаат на петтото место, кое води во Лигата на Европа, а до крајот ќе се обидат да дојдат макар до четвртото и до квалификациите за Лигата на шампионите.
Можат да освојат 75 бодови, односно девет бода повеќе од Сити минатата година, кога „граѓаните“ беа четврти и играа во Лигата на шампионите. Арсен Венгер, менаџерот на Арсенал, пред натпреварот со Сандерленд изјави дека тимот ја плаќа цената за сопствената неконстантност во текот на сезоната.