08.11.2017 ПСЖ ќе мора да продава или ќе биде исклучен од Лигата на шампионите
Фудбалскиот клуб ПСЖ би можело да има проблеми поради непочитувањето на финансискиот фер плеј во сезоната 2017/18.
Како што пренесува „БФМТВ“, претставниците на УЕФА пред почетокот на сезоната ќе го проверат буџетот на клубот и трансферите направени летото оваа година.
Парижаните во летниот преоден рок го ангажираа Дани Алвес како слободен играч од Јувентус. За Нејмар на Барселона ѝ платија 222 милиони евра, додека Килијан Мбапе го зедоа на заем од Монако со обврска да го откупат договорот за 180 милиони евра.
Претходно, претставниците на ПСЖ одржале состанок со челниците на УЕФА и им ги понудиле сите неопходни информации за договорите на Нејмар и на Мбапе.
За да ги задоволи сите стандарди, клубот од Париз во зимскиот преоден рок ќе мора да оствари приход од 80 милиони евра од продажба на играчи, а последните дена најмногу се шпекулира дека Единсон Кавани ќе оди во Премиер лигата. На листата на трансфери најверојатно ќе бидат и Анхел ди Марија и Лукас Мура.
На ПСЖ оваа сезона не му се закануваат санкции, но УЕФА во сезоната 2018/19 би можела да го исклучи од европските натпреварувања.