05.12.2017 Лига на шампиони: Шанса за Италијанците, Атлетико веројатно ќе испадне
Конечно дојде време за расплет во Лигата на шампионите. На првиот ден од шестото коло не се познати вкупно тројца патници за осминафиналето. Во групата А голема борба водат ЦСКА од Москва и Базел, во групата С ќе играат Атлетико и Рома, а Јувентус и Спортинг од Лисабон во групата Д.
Во најдобра позиција е Рома, која на нејзиниот „Олимпико“ ќе го дочека аутсајдерот од Азербејџан, Карабаг и во случај да победи, ќе се пласира во следната фаза без оглед на резултатот од Лондон меѓу Челзи и Атлетико Мадрид.
Рома во луда комбинација може да биде трета, но и прва. Ако сензационално изгуби или ако одигра нерешено, со триумф на Атлетико, нема да продолжи понатаму, но ако, според очекувањата, победи, а Челзи одигра барем реми со избраниците на Диего Симеоне, во нокаут-фазата ќе се пласира од првото место поради подобриот меѓусебен скор.
Челзи обезбеди пласман во осминафиналето, но сигурно нема да се задоволи со расплетот на второто место...
Слична е ситуацијата во групата Д, Барселона го обезбеди првото место во групата и ослободено го дочекува Спортинг, кој на „Камп ноу“ ќе мора да победи, а Јувентус да киксне во Пиреја против отпишаниот Олимпијакос.
Што се однесува до групата А, ЦСКА и Базел ќе бараат триумф на гостувањата кај гигантите Манчестер јунајтед, односно Бенфика.
Базел има подобар меѓусебен скор во однос на ЦСКА, но и полесен ривал бидејќи ќе игра во Лисабон против Бенфика, која е без бодови и без натпреварувачки мотив, но јасно е дека ќе даде сè од себе од Европа да се збогува барем со некој бод.
На Манчестер јунајтед му е потребно реми за да го потврди пласманот од првата позиција, па дури и при низок пораз ќе биде прв.
Најјасна е ситуацијата во групата Б, ПСЖ и Баерн ќе играат во осминафиналето, Селтик оди кон Лигата на Европа, а Андерлехт е последен.
Распоредот би можело да биде поинаков само ако Баерн во Минхен го совлада ПСЖ со разлика од четири гола и ја преземе челната позиција, а Андерлехт на бучниот „Селтик парк“ направи подвиг од три гола повеќе и остане на меѓународната сцена.
Сите натпревари се играат денес, од 20.45 часот.