18.9.2018 Во Белград да имаше стадион од 400.000 седишта, ќе беше распродаден
По 26 години чекање, Црвена Ѕвезда утревечер ќе биде дел од групната фаза во Лигата на шампионите
Српскиот првак на свој терен ќе го пречека италијанскиот калчолигаш Наполи. Уште од претходно се знае дека стадионот „Рајко Митиќ“ ќе биде исполнет до последно место и дека домаќините ќе имаат фантастична поддршка.
Сепак, ни гостите нема да бидат сами. Според најавите, во Белград ќе допатуваат 350 ултраси на Наполи. Фановите на Наполи се познати како едни од најопасните, па можно е утре, освен што се очекува битка на теренот, да биде „жешко“ и на трибините.
Тренерот на Наполи, Карло Анчелоти во Белград ги поведе своите најдобри играчи и најави дека не сака да стартува со кикс. Тоа значи дека „наполитнаците“ се заминати да ги освојат трите бода во Белград. Црвена Ѕвезда е аутсајдер во групата каде што уште се и Ливерпул и Пари Сен Жермен.
Претседателот на „црвено-белите“, Звездан Терзиќ најави дека интересот за сите три средби е неверојатен.
„Да имавме стадион кој собира 300-400 илјади гледачи, ќе беше распродаден. Екипата е подготвена за надигрување. Сега се очекува само спектаклот да започне“, рече Терзиќ, во исчекување на утрешниот дуел.