Берлускони и Морати дербито им го препуштија на Кинезите и Американците

Интер и Милан имаат сопственици од земјите кои се велесили во светски рамки.

Неделното градско дерби помеѓу Интер и Милан ќе биде и битка на Кина против САД, двете светски велесили, бидејќи на чело на клубовите се богаташи од тие земји. Во минатото, ривалството беше меѓу Италијанците Масимо Морати и Силвио Берлускони, но сега приматот е кај странците.

Компанијата „Сунинг“, која го поседува Интер, е индустриски гигант од Нанџинг и богатството им е проценето на 63 милијарди евра. На чело е Џанг Џиндонг, кој е 85-ти најбогат човек на светот. Милан е купен од компанијата „Елиот’ од САД.

Италијанците се шегуваат дека наместо „Форца Интер“ и „Але Милан“, ќе се скандира „Фоца Инда“ односно „Кам он Милан“. И во филмовите секогаш било интересно да се гледаат битките на Истокот и Западот, некој навива за Џеки Чен, некој за Рамбо.